صحّ وغَلَط

قزحيا ساسين

مش بـ وقتو

ما في وقت غَلَط، في “صحّ” مش بـ وقتو.

هريبِه

ياما ناس بيجيبو حدا يشتغل عَنُن، منشان ما يغلطو هنِّه.

بِـ عيونو

يللي بيشوف كل شي صحّ، بيكون الغَلَط بِـ عيونو.

صلا

يا ربّ، نجّيني من الغلطَه لْ ما بتتصلَّح إلاّ بـ غلطه أكبر.

درجِه عاليِه

ياما الصحّ بيكون أعلا درجِه بـ سلُّم الغَلَط.

انشالله يغلط

يللي كلّو غَلَط، كيف ما غِلِط بيطْلَع الغَلَط معو صحّ.

كبيرِه

مرّات الغلطَه ما بينقال عَنا صحّ، لأنّا مش كبيرِه كفايِه.

كيف؟

إزا كانت التَّوبِه صحّ، كيف بتكون الخطيِّه غَلَط؟!

صعبِه

كيف بدَّك من إبنك يعمل كل شي صحّ، إزا كنت إنته جايبو بالغَلَط؟!

غربال

الغربال بيتْعَب من الصحّ اللي بقي فيه، مش من الغَلَط اللي صار تحتو.

شيطان

ما حدا قدّ الشيطان بيعْرف يعزم الناس بالصحّ عالغَلَط.

سبحان ألله

الكلمه الغَلَط المكتوبِه بـ قلم مروَّس، أحلا من الكلمِه الصحّ المكتوبِه بـ قلم بدّو بَري.

معقول؟!

ما في غلَط أكتر من الصحّ اللي عْمِلتو، ومش عارفو ليش صحّ.

تقليد

مش كلّ اللي بْيِعملو الصحّ متل بعضُن. حدا بيعمل صحّ، وحدا بيقلّدو.

فتّحو عيونكن

الإشيا اللي بتنعرف من أوَّلا، ما حدا بينتبه إزا كان آخِرا غَلَط.

ضريبِه

ما طِلِع الشوك بـ خاصرة الوردِه لأنّا عم بتفكّر غَلَط.

الشوك ضريبِه، بْيِدفعا الصحّ عا طول.

… ولَ شو؟

الصحّ إزا تطلَّع بـ مرايتو ومش مصدّق حالو، ما بيصير”صَحَّين”، بيصير غَلَط.

طلاق

الطلاق بيكون بعد الجازِه غَلَط، وقَبلا… ما في صحّ أكتر منّو.

حِلُو

شو حلو الصحّ، لمّا بيكون غلطَه… بـ محَلاّ.

مش زابطَه

يا ما الصحّ بيكون غلطَه مش زابطَه.

مش خسارَه

شو بْيِخسر الزّيح الصحّ إزا الغلطَه عِمِلتو دوَّيرَه؟!

جديدِه

الغلطَه الجديدِه بتشوف حالا عالصحّ العتيق.

فوق وتحت

لا فوق صحّ، ولا هَون غَلَط. القصَّه أكبر من هيك.

تعَلَّم بـِ بيّو

إبن الصيّاد شاف بيّو عم يغمّض عَين تا يشوف صحّ. غمَّض العَينتَين تا يصيب أكتر، وتصَيَّد… بَيّو.

المَيّ بتتفرَّج

السفينِه اللي بتفكَّر صحّ، بتمشي مع الهوا لمّا بيفكِّر غَلَط.