بِحلم ببلادي تتغيّر

د. جميل الدويهي 

 

بحْلم ببلادي تتغيَّر

بحْلم شُوف البحر مهَفهفْ

لا كْياس، ولا قزاز مْشَعَّرْ

بحْلم إنّي شوف التاكسي

عم يوقَف عالضوّ الأحمر…

وعم إحلم إنّو أحلامي

لَنُّو شي مرّه تتفسّرْ…

_____

بحْلم شُوف الفِقرا غْنايا

وما يبْقى إنسان معتّرْ..

بحْلم شُوف رغيف الخبز كبيرْ

ومش عم يزْغر، يزْغر

بحْلم شُوف اللمبَه عندي

عم تِضْوي،

تا يِحلا المنظَر

بحْلم إنُّو تحْكُم فِيِّي

دولِه كِلاَّ إنسانيِّه،

وما تِحْرمني من الحرِّيِّه…

بلادي من غير الحرِّيِّه موت

وبالحرِّيِّه بتِعْمَرْ.

_____

عم إحْلم بالشارع أنضف

والبستان اليابس أخضر…

وما يهْدُر صوت الدبّابه

بقلب الغابه العم تتدَمَّرْ…

عم بحْلم مَيّ المقطوعه

تِمشي، وما تُوقَف بالقسْطر

والتاجر ما يطْلع صوتو،

ويشارعْني بقلب المخفر…

عم بحْلم الحْكومه تكون لمصلحتي،

وما بدِّي أكتر

والساسِه يكونو خِدّامي

وما يْجيبولي ضغط، وسكَّرْ.

_____

بِحْلَم إنّو لمّا تْشتّي

ما تِغـْرق بالشارع سِتّي

وما نعْرف وينا، ونتحزّرْ…

والسيّاره البدها دفشِه

ما يبلعْها النهر الأصفرْ…

عم بحلم بالزفت جْديد

وما عِنّا زاروب محفّرْ…

عم إحلم ما نْكبّ زْبالِه

عا دْروب الحالِتها حالِه

وما فيها برميل مسكّرْ…

_____

عم إحلم شوفير الباص

يفتِّح عيْنو… وما يتْهوَّرْ

وما يْسَكّر كيلومِتراجو

من بيروت لْضهْر البيدر

وما يِشْلح كعب السيكاره

من شِبّاكو بحرش صْنوبَر…

عم إحْلم إنّو يوصِّلني،

وما يْسابق مع خَيُّو اسكندرْ!

عم إحلم ما يْرُوح فْرامو،

ونِنْزَل دادي

صوب الوادي

ونْطَوِّل تحت، ونتأخّر…

_____

وعم إحلم مجلس نوّابي

ما يْشَلِّحني حق تيابي

ويْشَحِّدني ملح، وزعتر

والنايب ما يحمل كرسي

ويهاجمْني متل البربر…

واللي عم يحكي عالشاشِه

وهوِّي أصلاً واحِد غاشي

عم إحلم إنّو يتبخّرْ…

عم إحلم يا شعبي الخايف

ما نتفرَّق بين طـْوايِف…

تا نبقى للشرق مرايِه

ونبقى المجد الما بْيتكسّرْ.

_____

عم إحلم يا ليل تْصفِّي

بجوِّ بلادي فجر منوّر…

حاجِه فينا تضيع الدفِّه

ونبكي عالماضي، ونتحسَّرْ

وعم إترجَّى عدل الحاكم

ومْحاكمنا تصير محاكم

تا القاضي يصرخ بالظالِم:

أوعا تتمرجل عا شعبَك

الله وشعبكْ هِنّي الأكبر.

_____

عم إحلم غيِّر، وبغيِّرْ

ما بدِّي سيف، ولا خَنجَر…

بدّي رْجال يكونو رجال

وبدّي الأجيال العم تسهَرْ…

بدِّي الحاضِر يمحي الماضي

ويخَزِّق تاريخ مزوَّر

بدّي إطْلع فوق جبالي…

تا صَوِّر شمس، وإتصوّر…

وبدّي إشْلَحْ طقم البالي

عن حالي

تا يِفْضى بالي

وشُوف بلادي عم تتحرَّرْ.

***

(*) مشروع أفكار اغترابية للأدب الراقي-سيدني 2016.