هَيك بِتْضلَّك…
لميا أ. و. الدويهي
رَح بتضلَّك الحبّ اللي ما بينتهي
ولو أنا صُرت بَرَّات هالدِّني
رَح بتضلَّك القلب اللي بينبُض
بقلب هالعمر اللي عم يِمْرُق
وحدَك بتلوِّن الرُّوح
وبتعطيها البُعد المِش مَنظور
بترفرف فوق حدود
ما لمحتها لليوم عيون…
لمَّا بتطلَّع من عندَك
بيكتمل الوجود بحبَّك
وإذا بتطلَّع بعيد عنَّك
بينقص الحب وما بِكَمْلَك…
يا هالحبّ الأديم
بَعْدَك عن كتيرين بعيد
خلِّيك عم تدق ابواب
يمكن بلحظة تتغيَّر الأحوال
تتفتَّح نُفوس،
تقشَعَك بالنُّور
وبدون ما تحكي،
تلمَع وفيك تُضوي…
١/ ١ /٢٠٢٢
