عقلبِك بفوت…
لميا أ. و. الدويهي
بفوت عقلبك وبغل
وعطر محبتِك بشم
ومن حنانك بعبِّي وبغب
كل ما يوافيني الغم…
فيكي شي من السما
فيكي شي أوفى من الوفا
فيكي شي ما بينتسى
بيعزي القلب ولو كنتِ بأبعد مدى…
ما إجا ببالي بيوم الفراق
إنك بالملقى دايما عالابواب،
طلعت الأمومة أقوى من الممات
بتضلها للأبد حدّ الولاد
بتغرف من نبع الحنان
ولعندون بتودي اكوام
بتكفيهون إيام،
بتكفيهون أعوام…
ما لحقتي فلَّيتي
تا رجعتي بروحك طلَّيتي
وبطيفك حوالينا حلِّيتي
وقوة إلنا من فوق استمدَّيتي
خفتي من دونك تقسينا الحياة
خفتي ما نقدر نتحمل غيابك والفراق
رجعتي ومع إنُّو عيونك عن عيونَّا بعاد
بحبك اللي ما بينقاس،
علينا تحنِّي وترفِّي،
ومن كل شر تحمي
ومن عليائك تصلِّي
وخطواتنا ترافقي وتظلِّلي،
ياللي إنتِ من القداسة شقفة
من صوبك بتهبّ الراحة نتفة
بتقطف الأشواك
وبتبدر محلَّها أشواق
بتعبِّد طرقاتنا قْوام
تا لعندك بوقتو تودِّينا أَوام…
۲۰ /۳ /۲۰۲۲
