شَحّ القنديل
جوني مقدسي
مْبارِح كُنِت عَم شُوف قنديلي
بَعرِف ما عاد كْتير يِضويلي
تَحت الرُّبع في زَيت وُمشَحتَر
كَمشِة عُمر بالكاد باقيلي
***
عَم إكبَر وعَم بَيِّن مْخَتيَر
وعَم يِكبَروا الشُّعَّار مِن جِيلي
شاعِر مِتِل هَالنَّاس رَح إكبَر
بَسّ المَرا بِتضَلّ تِعنيلي
***
ياما ترَكِت بَصمات عالمَنبَر
وياما نحَتِت قُصدان بِزميلي
وأَعطي القصيده رُوح مُش أَكتَر
مِن واجِبي وما بْرَبِّح جْميلي
***
وكُل ما رُحت تا أُمسيه إحضَر
عَ مَنبري الأَقلام تِحنيلي
إشرَب حبِر تا هَلوس وإسكَر
وصَلِّي الشِّعر تا يْصير تِرتيلي
***
شاعِر غَزَل عَ كِلمتي بِسهَر
وصَوتي عَطاني صَوت تَفضيلي
وبُكرا بَعِد ما مُوت رَح إظهَر
كُل ما يجوا عالمَقبَرة الحلوين
وكُل ما الحِلو بالإِيد يُوميلي
