إعادة تدوير الفرح

أحلام هيثم بناوي

 

اللّي عندو شي فرح يابس كرامة مكسَّرة للبيع

انا شَرّا

اللي عندو قلب مُستَعْمَل ولو مَرَّة

انا شَرَّا

اللي عندو حلم لو تهريب من بَرَّا

وما كان يصير ع قياسو

رغم ريجيم إحساسو

انا شَرّا

تعو تنعيد تدوير الفرح فينا

تعو نجدّد امانينا

تعو ما نكسر الجَرّة ورا احلامنا الحلوي

ولا المرة

تقلك سر .. بالجكرا

أنا هالقدّ متصالح مع الفكرة

أنا هالقد متصالح مع امبارح

ومع بكرا

اللي عندو فرحة النطرة

وناسيها بْ دروج الشيب

إجا يصبغ .. قالولو عيب

وماتت نطرتو بسرّا

اللي عندو شي فرح يابس 

شي ضحكة مرقّعة للبيع

انا شرا

تَ وَزّعهن ع شعب كبير

ضاق الهم ع كتافو

شعب محروق سلّافو

وما بدو يهاجر لْبَرّا

…. أنا شرا

***

*شاعرة وصحافية  سورية خمس مجموعات شعرية مطبوعة في الشعر الفصيح الموزون بالعناوين التالية: “الحلم  الأول”، “على نحاس الذاكرة”،  “أحلام لم تكتمل”، “أسئلة السواقي”،”ستكون وحدك”.