أنا وْوِجّي
حبيب يونس
قِدَّيْش خِتْيَرْنا…
ما عاد ياسْمين الْعِمِرْ
يِتْكي ويعَرْبِشْ عَ قناطِرْنا.
صِرْنا عتاق وْما بِقي
إِلّا خيال قْلامنا
وْغَبْرِةْ محابِرْنا.
كِنّا بِالِمْرايي سَوا
وِجّي تَرَكْني وْفَلّ
وِبْقيت قِدّام الْمرايي ظِلّ.
يا رَيْت هَـ الْعِمْر الْمَرَقْ
يا رَيْت خَبَّرْنا…
كِنّا قَبِلْ ما نِنْكِتِبْ عَ بَعْضنا
مْحينا قوافينا
وخَزَّقْنا دفاتِرْنا.
يا عِمْر وَيْنْ كِنّا؟
تلاتي بْتِحْلُف الْكِلْمي بْبَيادِرْنا،
الْبَيْدَرْ يِبِسْ
كِلّ عْصافير الْقَمْح يِمْكِنْ تَشْرَنو
بِقْيِتْ مرايي وْوِجّ،
وَحْدي، ما حَدا بْيَعْرِفْ حَدا…
يا عِمْر كيفْ صِرْنا
يا شِعْر كيف صِرْنا…
قِدَّيْش خِتْيَرْنا
وِالشَّوْك عَشْعَشْ بِقناطِرْنا!!!
16 – 6 – 2019
****
(الصورا بعدسة الصَّديق ناجي مسعود)
