همة إلى قمة
نورة السبيعي
(السعودية)
ليلة وفا والليله رعود وبروق
يامرحبا بإسم الفخر والعزاوي
يادار جينا تمطر كفوفنا شوق
والنبت ريحه بالسما عود جاوي
يادار وأنتي بالأمل مسكنك فوق
لامس حدود الشمس نورك سماوي
على العهد جيناك عاشق ومعشوق
صدوورنا خضرا وقلبك هواوي
تسع وثمانينك لبسنا لها طوق
وننثر لها ورد وقصيد وغناوي
لك الولا والحب منزالك الموق
لك إنتمينا والفخر نور ضاوي
يافرحة قلوب ٍ لها الحب منطوق
كلّل مساعيها الحصيف المداوي
اللي عطانا حقوق وحقوق وحقوق
من شافها ماعاش قلبه خلاوي
مليكنا اللي لأمره أرواحنا نسوق
لجل الوطن جينا نحث الخطاوي
أبو فهد له وقفةٍ تشفي العوق
أبو فهد عوق الخصيم الشقاوي
يمينه معزّي دوى كل مطفوق
من عانده يبشر بـ شر وبلاوي
هذاك أبو سلمان للمجد مخلوق
ذر الرماد بعين حاسد وغاوي
يمشي بأمر الله ولا هوب ملحوق
ناوي لخير الشعب والشعب قاوي
يرسم لنا يم العلا درب موثوق
وطلع بنا طلعات حرٍ نداوي
همّه إلى القمّه ولاهوب مسبوق
ونقول له أبشر معه مانراوي
أعظم رسالة حب بالدم وعروق
تحكي بها الأجيال مع كل راوي
رؤية عظيمة كلنا لشوفها نتوق
ونساهم بتحقيق حلم ورجاوي
ياموطني لك عندنا موعد شْروق
مع رؤية محمد عظيم الهقاوي
