ضيعانِك يا بلادي فينا

مطانيوس ناعسي

 

 

ضيعانِك يَ بْلادي فينا

     

      يا عَمِّي كِفْ حَامِلْتِيْنا؟!

 

طَقْش وْفَقْش وْنَفْشِةْ رِيش

     

      كِزْب وْتِلْبيس طْرَابيش

 

وِالرَيِّس يِسْلَم وِيْعِيش

     

                 نْ كان مْنيح نْ كَان وْحِيش

 

إي والله ضيعانِك فينا!

 

 

يَ بْلادي مِنْ يَوْم الجِيْنَا 

  

      مِن يَوْم خْلِقْنَا وِوْعِيْنَا

 

كِنَّا هَيك… مْنِبْقَى هَيك

     

      أَمْرَك يا ريِّس يا بَيْك

 

زَبِّط حَالَك… دَخْلَك لَيْك

     

      شو هِيي وِقْفِت عْلَيْك؟

 

عَبِّي هَالجَيْبِي وِعْطِيْنا

 

 

شَعبِك بِيْبَرْبِرْ مش راضي

     

      بينِقّ بْيِحْكِي عَ الفاضي

 

حِطّ الوَرْقَا بالصّندوق

     

      عَ الغِمْضاني حِطَّا… زوق

 

شِمّ الليرَا أوعا تْدُوق

     

      تَمّ الوَاجِب يلاّ… سُوق

 

يا شاطِرْ ضَهْرَكْ فَرْجِيْنا

 

 

شَعْبِكْ صَار بْكَعْب الوادي

     

      بَعْدُو قَاعِد مِتْل العادي

 

وَيْن المَيِي بَدِّي غَسِّل؟

     

      طَقّ الهَاوِس يَلاّ عَجِّل

 

رَاحِت رِجْعِت ما بِتْطَوِّل

     

      رِجْعِت راحِت عجِّل حَوِّل

 

وِتْكَهْرَبنا قدْ ما حْكِينا

 

 

يا أرْضي يا أرض الخَيْر

     

      يا قبْلِة أنْظار الغَيْر

 

إنتِ بْلاد الشمس المَيْ

     

      الله قالا ما في مَيْ

 

ناقِص والله بعد شْوَيْ

     

      نور الشمس نْبيعو فَيْ

 

وِنْعَبِّيْها بِقْنانِيْنا

 

 

كِنْتِ وْبَعْدِك وَالله حِلْوِي

     

      جَنِّي خَضْرا، أرض بْتِغْوي

 

لكِنْ كِتْرو الكِزّابين

     

      يا رُوحي والمِحْتِكْرين

 

صَار رْغِيف الجُوعَانين

     

      بَيْن نْيَاب الفِجْعَانين

 

والمَركب ناطر عَ الميْنا

 

 

رَاحِت إيّام البَحْبوحَا

     

      أَزْمِتْنا الهَيْئَا مَفْتوحَا

 

هَاتِيْلِكْ قَمْحَا بِشْعِيْرِي

     

      ما في لِيْرَا، ما في مِيْرِي

 

ما في فِكْرَا، لَنّو زْغِيرِي،

     

      شُو في بُكْرا، جَدّ كْبيرِي

 

مِنْ بُكْرا دَخْلِك صونينا

 

 

قَلِّ الرزْق وْمَا في غَلِّي

     

      طَبْخِة بَحْص وْمَا في حَلِّي

 

وَيْن الرادِع وَيْن الزاجِر

     

      نَشَّف دَمّو مات التاجر

 

مات الزارع، عاش الفاجر

     

      والصّانِع بُكْرا بيهاجِر

 

مِنْ غَدْر الإيّام حْمِيْنا

 

 

شي بِيْمَوّت، خِلْقي ضاق

     

      أزمِة إِحْسَاس وأخلاق

 

كل شي عَم يِرْجَع خِلْفَانِي

     

      صِرْنَا جَدّ بْعَالَم تَاني

 

قِلِّة زوق وْكَاني مَاني

     

      طول لْسَان وْكِتْر خْيَانِي

 

شُو بَابِلْ؟! الله يِشْفِينا

 

 

 قوليلي وَين الفَنّان

     

      وَيْن المُطْرِب والألحان

 

وَيْن الأشعار وْكِتّابا؟!

     

      وَيْن الأَنْغام وْأَرْبابا؟!

 

صرْنَا شَلْحِت زادو حْبَابا

     

      نَوِّت نَقْشِت طار حْسَابَا

 

والمَوْهُوبِي الله يْعِيْنا

 

 

ما بَعْرِف كِفْ طَايِقْتِيْنا

     

      لَيْكي مَلاّ زَرْع جْنينا

 

في عِنَّا شي مِيِّة شارِع

     

      كِلْ شارعْ في عِنْدو شارع

 

شَعْبِك شَاطِر شَعْبِك بارِع

     

      شُو أحْزَان اسْمَ الله زارِع

 

نَشَّف دَمْعِ العَيْنِ، عْمِيْنا

 

 

أمّا شُوفِي هالإِعلام

     

      لا بِيْكِنّ وْلا بِيْنام

 

مَقْروء وْمَرْئي وْمَسْمُوع

     

      شي مَطْبُوخ وْشي مَنْقوع

 

شِي مَنْفوخ وْشِي مَفْقوع

     

      في شي كِلْمِي سَدِّت جوع؟

 

صاير طعم الكِلْمِي كِيْنا

 

 

ضاع المَنْطِق مِدْري وَين

     

      صار الحاجب تحت العَين

 

غِرْقِت حِجِّتْنا بالوَحل

     

      هَرْج وْمَرْج وكترة جَهل

 

فَزّ المِخْصي فوق الفَحل

     

      وِالبَرْغَش طَهْمَز عَ النحل

 

وِالواطي فِكْرو يغرينا

 

مِنْ مَاضِيْنَا ما تْرَبَّيْنَا

     

      بَعْدُن حكَّامِك عِيْنَيْنَا

 

مِنْدَافِع عَنُّن كَقْرَايِِب

     

      مِنْسَمِّع دَرْسُن عَ الغَايب

 

لَتّ وْعَجْن وْمَنطق خايب

     

      كَرّ وْفَرّ وْعدّ مْصَايب

 

مِنُّنْ يا ربِّي نَجِّيْنا

 

  

حَاجِي تْقُولي مَا جَنَّيْنَا

     

      منْ أمْجَادِك شُو خَلَّيْنا؟

 

كَلْنا جْبَال كْدَشْنَا هْضَاب

     

      شِلْنا تْلال وْبِعْنا تْرَاب

 

صار الغالي لِلأغْرَاب

     

      والشّارع يا مَحْلا الغَاب

 

وِالأزعَر بَدّو يْرَبِّيْنا

 

بِتْقُولي ما خَصُّو شَعْبِك؟

     

      شُو مسكينِي وْطَيِّب قَلْبِك

 

نِحْنَا اللي شَوَّهنا بَحْرِك

     

      وِفْلَتْنا المَجْرُور بْنَهْرِك

 

وِنْسينا كِفْ نِحْمِي ضَهْرِك

     

      وِقْبِلْنا نِتْمَادَى بْقَهْرِك

 

وِكْتَبْنا لَيْلِكْ وِشْقِيْنا

 

 

مَقْهور وْزعْلان القاضي

     

      سَيْف العَدْل الحَدُّو مَاضي

 

كلْ شي ماشي بِالمَقْلُوب

     

      لِ حْرَامي عِنَّا مَوْهُوب

 

وِالعَاقِل وَاحِد مَجْدُوب

     

      وِالمِزْنِب زَنْبو مَحْجُوب

 

مِنّا دُودِ الخَلِّ وْفينا

 

 

يرْحَم إيَّامَك يَا جدِّي

     

      شُو تِبْقَى بَيْتُوتي وْجدِّي

 

وْسِتِّي تِخبز عَ التنّور

     

      طِلْمِي ريحِتْها بَخُّور

 

تِطْبُخ تِنْفُخ عَ البَابور

     

      كَلْساتا أَسْوَد مَكْرور

 

وِتْحِبّا وعَنّا تِحْكيْنا

 

 

يِرْحَم إيَّامِك يا سِتِّي

     

      شُو كِنْتِ مْشاكِلْنا تْرَتِّي

 

وِتْقولي يا بو عبدالله

     

      لَوْ عِنْدَك رِزْقَا بْتُوصَلاّ

 

يِلْعَن بَيِّ العِمْلِي يَلاّ

     

      لا تِزْعَل بِيْعَوِّض الله

 

خَيْرِ المَوْسم بِيْكَفِّيْنا

 

 

رِزْقَ الله إيّام الماضي

     

      والإلْفِي وِالبال الفاضي

 

يِبْقى القمح يْتَلِّي الدّار

     

      نِسْلُق نِسْلُق لَيْل نْهار

 

وِالكَرْكِي تِجْمَع زوّار

     

      زَوِّيْقَا، وِتْجِنّ النار

 

وْكاسِكْ يا بْلادي، خَلِّيْنا

 

 

شو كانت حِلوِي العَتَابا

     

      والميجَانا والرَبَابَا

 

يبقى الجار يْحبّ الجار

     

      والكِلْمِي وزنا قنطار

 

والباب مْشَرّع هالدّار

     

      عَمْ بينادي فوت سْهار

 

وْشو كانت حِلْوِي بَزْبينا( )

 

 

مِيْنِ المِنَّا عارِف حَدُّو؟

     

      مِيْن اللي عَقلو بيردّو؟

 

هَيْدا عَنْتَر هَيْدا الزِّير

     

      هَيْدا الإسْكَنْدَر الكْبير

 

وْمِن نَفْخَا وِحْدِي مِنْطير

     

      بِبْلاد العَالم مِنْصير

 

عيب الشوم عْلَيْنا، نْسينا

 

 

شَعْبِك عَم يِدْفَع يَوْمِيي

     

      بِوْلادو حَقّ الحرِّيي

 

بْجَاه الأبطال اللي راحو

     

      وِالأطْفَال الهَيْك انْزَاحو

 

بْجَاه الإمّات اللي ناحو

     

      كِلّ اللي ماتو وارتاحو

 

قُولِي الحَقّ عْلَيْنا، شْكِيْنا

 (2008)