من ذكرياتي الإعلامية… لقائي مع عميدة فن الرقص والاستعراض الفنانة اللبنانية الكبيرة بديعة مصابني
نبيل غصن
*ملاحظة: النص باللهجة المحكية
من حسن الصدف بحياتي اني تمكنت قابل عدد كبير من كبار الادباء والفنانين في العالم العربي بحكم عملي كصحافي، وكمدير عام للبرامج اذاعة لبنان، ومراسل لعدد من الاذاعات العربية والاجنبيه. كان الاديب المرحوم سمير شيخاني صديقي وزميلي باذاعة لبنان،، ومنو عرفت انو الفنانه الكبيره بديعه مصابني بتكون خالتو شقيقة امو، اللي كان الها تاريخ فني كبير بالماضي بمصر، وبأواخر ايامها رجعت على لبنان وانهت حياتها بوطنها… وطالبتو يعرّفني عليها وهيك كان…
قابلتها واجريت معها حديث مطوّل، رح اختصرو الآن ببعض الاسئلة والاجوبه المهمة…
بداية مشوارها الفني
اول ما سألتها عن بداياتها الفنيه وكيف وصلت لمصر؟ جاوبتني بصراحتها المعهوده:
-“كان والدي يملك مصنع صابون بسوريا وكنا انا وامي واخوتي عايشين معو، لكن الظروف خانت الوالد فخسر معملو وفلوسو”.
فاضطرت هيي واخوها يشتغلو باحد المصانع وعمرها ما كان تجاوز ال٨سنوات، لكن رب عملها كان انسان مجرم فاعتدى عليها واغتصبها متل الوحش وهيي بعمر الورد … حاولت امها اقامة دعوى ضدو، لكنها تعرضت لمضايقات كتيري، الشي اللي اجبرهن هيي وامها واخوتها، الهجرة للبرازيل … وهونيك ادخلت بديعة لمدرسة الراهبات وبدإت دراستها ورعايتها وكانت متفوقه بدروسها، واثناء دراستها واقامتها بالمدرسه، اكتشفو الراهبات موهبتها في الرقص والتمثيل والغناء، ومن وقتها صارت بطلة مسرحياتهم المدرسيه.
لكن بعام 1919 قررت امها تسافر لمصر لتمضية اجازة كم شهر، وبحديقة الازبكيه اللي كانت اثناءها مشهوره بوجود المسارح والحفلات.. هناك انجذبت بديعه لهالمكان وكانت بعز صباها ومولعه بكل شي اسمو تمثيل وغناء ورقص …
وخدمها الحظ باحد الايام وتعرّفت على عميد المسرح العربي جورج ابيض، فأُعجب فيها وبموهبتها وبدأ يسند الها بعض الادوار البسيطة بحفلاتو.. ولما قررت امها العودة للبرازيل، رفضت بديعة وهربت وتركت امها تسافر لوحدها… ومن هون انطلق مشوار بديعه مصابني الفني الحقيقي وتحقيق حلمها المنتظر.
علاقتها بالريحاني
بدأ اسم بديعه مصابني يلمع بمصر، وصارو المنتجين يتزاحموا ليتعاقدوا معها.. وبهالاثناء كانت هيي عم تلعب دور البطولة باحدى مسرحيات نجيب الريحاني تمثيلاً ورقصاً وغناءاً، وصار اسمها يتردد باعجاب على كل ألسنة الناس …
لكن نجيب الريحاني الى جانب اعجابو بموهبتها، كان معجب جداً بجمالها وخفة روحها، فاحبها وبادلتو هيي الحب وتزوجو عام ١٩٢٥، وكوّنوا معاً فرقة ضمت حوالى ٣٠ فنان بينهم: ماري كويني، وآسيا داغر وبشاره واكيم وغيرهم … جالوا على كل محافظات مصر وبلدان العالم العربي، واكتسبت هالفرقة شهره واسعه …
لكن بعد زواج استمر ١٨ سنه تم الطلاق بينها وبين نجيب الريحاني … والسبب حسب قول بديعه، انو نجيب كان كسول يحب النوم وما كان يهتم غير بالشرب والسهر مع اصدقاء السوء، وهالشي كانت ترفضو بديعه وكان كل همها تحافظ على مكانتها الفنية وطموحها الكبير لتقديم اعمال اكثر اتقاناً وابهاراً.
كازينو بديعه
سألتها: كيف استطاعت من بعد طلاقها من الريحاني تأسيس كازينو وفرقة باسمها لوحدها؟ اجابت:
– كنت واعيه وجمعت بعض الاموال من عملنا، وضحكلي الحظ لما عُرض عليي عام ١٩٤٣ شراء صالة عماد الدين بالازبكيه بمبلغ خمسة الاف جنيه.. هالملهى كان بهاك الوقت مشهور جداً وضخم مؤلف من ٤ طوابق، استغليتهن كلهن بمطعم، ومسرح، وكازينو للالعاب، وملهى بحدائق رحبه وغنّاء.
وانشأت حينها فرقة تمثيليه وغنائيه كبيري اشركت فيها اكتر من ٥٠ شاب وفتاة، برز منهم عدد من الفنانين اللي اصبحوا مشهورين فيما بعد، متل فريد الاطرش، واسمهان، ومحمد فوزي، وتحيه كاريوكا، وساميا جمال واسماعيل ياسين وغيرهم وغيرهم..
اكتسب كازينو بديعه مصابني بهاك الوقت شهره واسعه، وكان كبار القوم وكبار المسؤولين حتى الملك فاروق يزوروا هالكازينو دايماً ويتمتعوا باجوائه الفنية،من تمثيل وغناء ورقص وتسلية راقيه …
لكن بعد هالنجاح الكبير والاموال الطائلة اللي حصّلتها بديعه مصابني، بدأت مصلحة الضرائب تضّيق عليها الخناق وتطالبها بمبالغ طائلة، وهددتها بالحجز على الكازينو والفيلا اللي كانت تملكهن …
وبدأوا الفنانين ينسحبوا من عندها الواحد ورا التاني، مما جعلها تقترب من الافلاس… ساعتها حزمت امرها وباعت كل شي بتملكو بابخس الاثمان وعادت لبلدها الأم لبنان… عادت بثروه متواضعه قدرت تستثمرها بكم مشروع يعيشّوها بكرامه. ومن بين هالمشاريع اللي انشأتها بلبنان، مصنع اجبان وألبان بمدينة شتوره بالبقاع، نال شهره واسعه بهاك الوقت.
مجد باطل
سألتها: وكيف ورد لفكرك تأسسيس محل تجاري وتقرري التخلي عن كل شي بيتعلق بالفن؟ اجابت:
– انا اللي حققتو بالفن من نجاح وتألق ومجد ما بظن حدا متلي حققو بهاك الايام، لذلك اكتفيت وانتخمت من كل شي اسمو شهره ومجد ومديح وتكاذب… شفت كل هالاشياء مجد باطل ما الو قيمه تجاه راحه نفسيه وصحيه وايمان بربنا اللي وحدو خلقنا ورَسَـملْنا طريقنا …
لذلك ومن شدة حبي للارض والطبيعة، استثمرت بعض اموالي بالزراعة وتربية الدواجن، وانشأت محل بوسط مدينة شتوره بالبقاع خصصتو لبيع الالبان والاجبان وغيرهن من المأكولات…
وامضيت عدة سنوات وانا ادير المزرعه والمحل بنفسي وكنت سعيده ومرتاحه بآخر ايامي، شاكري ربي على كل اللي منحني اياه ومن اللي حرمني منو بذات الوقت، لانو الانسان ما بيقدر يحصل على كل شي بالحياة، بيكفي انو يكون سعيد بصحتو ومرتاح ضميرو حتى يلاقي ربو بسلام.
وبسعي من ابن شقيقتها الاديب الصديق سمير شيخاني رحمه الله، وتحت اشرافه، دونت الاديبة نازك باسيلا ابرز مذكرات بديعة بمرحلتين تاريخيتين وعهدَين متتاليين.. مرحلة الملكية بقيادة الملك فاروق … ومرحلة الانقلاب عليه وتسلم الرئيس جمال عبد الناصر قيادة مصر … وقد كان لهذا الكتاب – السيرة،. (https://teamdermatologymd.com/) قيمة فنية وتاريخية مهمة (صورة نسخةٍ مرفَقة من الكتاب الذي قدمته لي بديعة موقّعة بخط يدها).
وما مضي على اجرائي هالمقابله مع الفنانه الكبيره بديعه مصابني غير كم شهر، حتى استسلمت لارادة ربنا واسلمت روحها عام ١٩٧٤ عن عمر يناهز ال٨٣ سنه وهيي كما ذكرت مرتاحة الضمير…
رحم الله هالفنانه اللبنانيه العظيمه اللي كانت بالفعل مدرسه فنيه، تخرَّج على يديها عدد كبير من الفنانين العرب المشهورين واللي البعض منهم ما زال حي حتى اليوم.
