جور الحب

حامد الملافية

(الكويت)

 

علّميني دامك بْقلبي سكنتي

ليه؟ قررتي / تسدْلين الستاير !

 

ياحبيبة قلبي المخذول كنتي

جايره مثل الزمن لا صار جاير !

 

عن قسى ايامنا لو كان لنتي

كان ماعشت بْغيابك يوم حاير !

 

لو اقول انك على غايبك هنتي

خانني التعبير من قبل العباير!

 

ليه ماصنتي المحبّه يوم صنتي

الفراق : اللي اخذ مني البشاير!

 

لا تمثْلين الحزن .. لوّك حزنتي؟ 

كان برّيتي بوصلي .. يوم باير!

 

شانت الأيام فيني يوم شنتي

بس أنا لـ اجلك اسايرها مْساير!

 

لو ادور عن وصالك يوم خنتي

كيف ابلقى زاويه وسط الدواير؟

 

ليت لو مريتي بلحظة و بنتي

كان شفتيني بغيابك ويش صاير!

 

الزقاير قاسيه لـ قلبي، و أنتي

كنتي الأقسى من اضرار الزقاير!