ما تقلِّي
لميا أ. و. الدويهي
ما تقلِّي راح الحلى ببلد الحلى
وحلّ مطرحو الأسى
ما تقللي القلوب حزينة
وفيها جراح دفينة…
لا تقللي الوطن مات
وما بقي من الإنسان غير حفنات،
حفنات من تراب
ماشيين عالطرقات…
لبنان مشتت بين ناس وناس،
في بعقولون وهم وإلتباث
فاهمين إنو «زعيمون» هوي الأساس
وكل مرة بينسوا إنو، بالأساس،
«قلب الله» رح يبقى لبنان،
محفور بفكرو من أجيال وأجيال
وباقي بنعمة من الإله، بالقلب والبال…
قولَك رح يرجع الطهر رفيق البراءة
وضحكات الولاد وغمزات السَّهارى
يزيحوا العتمة والمرارة؟…
قديش بعد رح منجاهد
تا نمحي من الذاكرة
عمق البشاعة والحقارة
ويرجع يزهِّر الياسمين والبيلسان
ويفوح عطر الجوري والوزَّال؟…
مدري ليش وحدو بلبنان
بيخلق الإنسان من رحم الآلام
وبيشق غشاء الحياة
تا يقول للعالم أنا لبنان…
( ٧/ ٨/ ٢٠٢٠)
