ما بدِّي تصير توجَعني

لميا أ. و. الدويهي

ما بدِّي تصير توجَعني

ولا غيابَك عنِّي يقتلني

ما بدِّي إبتسِم للنَّاس

وقلبي مَطعون بحَربِة الفراق

ما بدِّي تصير بدفاتِر النِّسيان

وإنتَ بقلبي بعدَك الأساس…

خَلِّيك حدِّي من دون حساب

يمكن بِبُكرا الجايي ما يعود في مِقياس

خلِّينا هلَّق نمشي الدَّرب أحباب

والوقت بيكشف المشاعر ونوع الإحساس…

لا تقلِّلي بحبِّك أكتر من الأنفاس

ومِشتاق إتلمَّس عِشقِك وإنتِشي من هالكاس…

الحُبّ بين اتنَين مش هيك بينقاس

الحُبّ إتِّحاد بيلامَس الأحشاء

بينْما فيك وبتِنْما فيه

وواحد معو بتصير

ولو كان عن عَينَك بعيد

جوَّاتك بتشعر فيه

كأنُّو حالَك

من حالَك عم بتحاكيك

وساعتها اللَّهفة بتزيد

وبتخلِّيك تقَدِّر قيمة الشُّعور العَميق

ورح تعرف قدَّيش الصَّبر للتَّبَصُّر بيفيد

قبل ما شفافك تُنطق بكلمة «حبيب»

وبالآخر تكتشف إنَّك ما قلتَها بالمَكان الصَّحيح…

   ١٤ /١٠ /٢٠٢٠

 

(Diazepam)