الشمس والبشر
سليمان بختي
لما الشمس بتنزل على الشجر
الصبح بكير
متل ليلة القدر
وين منكون نحن البشر
ناس نايمة من تعب من وجع من قهر
وناس عازز عليها النوم
وناس ناطرين وراق السفر
ولا مرة بتنزل لحالها
بتنزل متل الأمل
بتعزم الهوا
وبتنده العصافير
وبتصير وراق الشجر
ترقص وتغني
والأغصان مرجوحة
يا شمس يا إم النور
مين شاف غليان الضو
مين غطّسك بالبحر
ومين نطّرك فوق الجبال
ومين شافك بعد آذان الفجر
وكيف بتلعبي بالصيف
متل ما بدك
حتى تغلي المي بالكوز
ويستوي العنب والتين
يا شمس ضلي عنا
ضلك معنا
نحن متل وراق الشجر
ناطرينك كل يوم
ارجعي بكرا
بكير عبكرا.
