“هالبنت ما بتتربا”
أمل وجيه ناصر
من لمَّا تعرّفت عليكْ
وعينيّي حَبّت عينيك
وايدييّ لمسِتْ إيديك
صار الليل بْيحلالي
وما بتفارق خْيالي
بقلبي ما بعرف شو صار
وحالي ما بيعرف حالي!
***
بفكر .. بتعب.. ما برتاح
ولا بعرف كيف الأفراح
ولا بعرف كيف عقلي راح
صرت بليلي معجوقه
بحس بحالي محروقه
كيف قلبي عم يتعلق
وروحي مني مسروقه
بقلبي ما بعرف شو صار
وحالي ما بيعرف حالي!
***
من لما شفتك حبيت
ونارك بقلبي حسيت
ضيّعت بطريق البيت
سحرك عني ما تخبا
وعطرك بْروحي عبّا
لاموني الناس وقالو
هالبنت ما بتتربا
حيضلو الحب بْبالي
وحالي ما بيعرف حالي!
