أحلام
سليمان بختي
في أحلام
بتنطرك بالفرشة
وقبلك بتنعس وبتنام
وفي أحلام
بتشوفها بس بالمنام
وبتقول بسرّك
هيدي حياة
لا هيدي تنين
وفي أحلام
بتفيقك بتسهرك
وما بتخليك تنام
وفي أحلام
بتفوت على قلبك
بتهدهدلك بتغنيلك
يلا ينام يلا ينام
لدبحلو طير الحمام
روح يا حمام لا تصدق
عمبضحك على حالي لنام
في أحلام
ما بتصدق حالك إنك حققتها
وفي أحلام طارت وما عاد فيك تلحقها
وفي أحلام
يا ريتها بقيت أحلام
ما تزعل ما تتذكرها
صارت خلف حدود اللوم
وفي أحلام
هيي بالأساس مش أحلام
تعب ضايع وهم عتيق
هيي كوابيس لابسة تياب الأحلام
وفي أحلام
ما إلك دخل فيها
بتشوفها بعيون الناس
بضحكات الولاد
بالناس الكبار
اللي زرعوا بكل أرض شجرة
وبكل قلب حلم
وبكل مطرح في
وبكل سما قطرة ندى
وفلوا بعد ما أعطوا الحياة كل شي
وراحوا وضل الضو
بيندهلن بيشتاقلن
وضل اسمهن بالدني
متل بيرق عالي
بيضوي كل فجر
بيمجد كل حياة
وبيوعي كل الأحلام