وجع بيروت
كمال المهتار
ماشي بدبي متوجّع ومكبوت
بِشارع ملان وما بتسمع توووت
أمن ونظام وهندسة وترتيب
ومترو وبشر آيات بالتهذيب
تذكرت لبنان وغمرني سكوت
ولبنان حولو ألف حوت وحوت
وبلشت إسأل ليش هيكي صار
صحرا رمال وحوّلوها غاؤ
وعنا الجناين ولّعوها نار
وع شوي بدهن يحرقو الملكوت
والموت صار يدق عا بيروت
ليش الخليج تقدم ونحنا
حملنا خناجر حالنا جرحنا
وفلّت الفرحة من مطارحنا
وصارت البومة كل بيت تفوت
وصار الحزن ع وجوهنا منحوت
هوني دبي ارتاح فيها البال
هون الريادة وجنة الأعمال
وعنا البنوك تسلبطو عالمال
وصفى عشانا الملح والبسكوت
وغول الغلا ما بيشبع ومفلوت
قلنا الطائف وقف التدمير
الا وإجانا المجرم الشرير
وعاد الحرب والضرب والتهجير
اغتالو الأمان ودمّرو البيوت
وتستروا بالدين واللاهوت
تقزّم عامود النور للشمعة
والعز ضاع وساءت السمعة
وبيروت صارت تشبه الدمعة
ولبنان صار بيشبه التابوت
وكلي امل لبنان ما بيموت
