قْدِرتي عبّرتي نيّالِك
روليت منصور
يا موجِةْ بحري لمّا
بِتْعَلّي وْتِعلي لَ فَوْقْ
وْمِتْلِ الطفْلِه لَ إمّا
بتعودي للبحْرِ بْشَوْقْ
مين لْ علّا موجاتك
بحرك؟ ولّا من ذاتك؟
ويمكن صرخَه جوّاتك
بدّك صرخاتي تْضُمّا
***
يا موجات البحر تْهدّي
ما حدا بْيِفْهملك قدّي
إنتي متلي لمّا تْحنّي
بْيِتْوتّر شوقك وِتْجنّي
نحنا بْوِحدِتنا سوا
نْفتّش، نُبْرُم عا هوا
حتّى ورداتو نْشِمّا
***
يا موجات لْ عم تتكسّر
عا حالا تبكي وْتِتْحسّر
قْدِرتي عبّرتي نيّالك
يا حالي عم شوفا بْحالك
لكن فيّي قولي كيف
تْعبّر ورقات الخريف
وقعت ما حدا لمّا
***
*من ديوان “كومة حكي”
