عيد؟
د. رمزي صالحة
بعدك موجِه صوبنا يا عيد؟ لا رخو باقي عندنا، ولا شديد
وطيورنا غابت بكم مهجر، وبالليل، وحدو بيسهر القرميد
وزهورنا لكانت بتتقطر، بفجر، بنغمات، بزغاريد
راحت تحت جزمات كم ازعر، وصارت خشاب ورودها بواريد
وأيام كنا عالقمر نسهر، ونحيي ليالينا بكل جديد
باب القمر بوجنا تسكر، نجوم السما عن دربنا بتحيد
ولبنان يللي كان يتمختر، بكام أرزة، وليل، وتهاويد
منتوف صاير، مِفْلِس، معتر، وآهات قهرو، قهر عمبتزيد
وبعدك موجِه صوبنا يا عيد؟ وبعدك بتذكر حينا، يا عيد؟
خليك ماشي، بابنا مسكر خليك ماشي ولوح من بعيد
