غَفْلِه
كرم سلوم
كان العُمر بَعْدو زْغَيَّرْ بالعُمر
أوَّلْ وْصُولي … وكان طولي شي نِدْر
يمْرُق تا ياخِدْني الصُّبح مِشْوار
نِلعَبْ بْضَيْعَه… كان إسْما الوَلْدَني
ونِرْجَعْ … وْجايِب مِن عَشِيّه مْنِ الدّني
حِطّْ المَسا بْقِجّة الوَقت … نْهار
خَبّي فِيا الإيّام حَتّى يِكْتَرو
وبالعيد تا أعْرِف شو صارو يِشْتِرو
إفْتَح القْجِّه .. عِدُّنْ .. يْصيرو سِني
ومِن بَعْد ما عِدُّنْ وْلاقيهُن غُمْر
خَبّيهُن لْ تاني سِني … وْتِخْمين
ضِلَّيتْ خَبّي سْنين فَوْق سْنين
تا وْعِيتْ مَرَّه … والوَقت بَعْد الضُّهر
وْلِ غْياب عَمْ بيدِقّْ عَ بابو العَصْر
شِفْتِ اللّي جِمَّعْتُنْ بْهالْخَمْسين
وَقْعْو عَنِ سْطَيْحِةْ هَوا تِشْرين
نْكَسْرِتْ القِجِّه … وِنْكَسَرْ ضَهْرِ العُمْر
