حاولت أتخطّاك ..

سحر الشهري

(السعودية)

 

حاولت أتخطّاك ..

وعجزت  بِي ” الخُطى “

و حاولت أقول إنك – خطا –

و ارهن طيوفك للغياب

واقفِل على ذكراك باب ..

وكلّ مايدني مسا

وقفت بوجهي وحدتي

واشفق على الحال ؛ الخيال

ويدقّ مِ الماضي جَرَس

ويجُرّ طيفك من ظلام الذاكرة

نحوي ( فَرَس )

و اتذكرك /

تشبه – بداية كل شي –

وما يشبهك إلا – الندم –

تشبه – تفاصيل الوجود –

وما يشبهك إلا – العدم –

واذوب في الذكرى

مثل ما ذاب فيني سِكّرِك …

–

–

غني و اغني يا نجوم :

ليه اليدين الي جَنت ،

ماهي يدين الي غَرَس !

وليه السما شحّت

وليه ، الغيم مايمطر فُرص !

–

–

غني واغني يا نجوم :

زُرني ، تعبت من الجفا

زرني خجلت أكذب بوجه السائلين ..

و شفاههم لي تبتسم

وعيونهم تنطق / أفاااااا ..

زرني تعبت آطيح من عيني

ومن عين الحظوظ

تعِبت ، أضحك فالعلَن

وابكيك و اندم في الخفا ..

–

–

مليت وانا أتلهّفك تطري

بحكي العابرين ..

ملّيت أعبّر للسنين

إني أنا كنت  – الخطا –

و ياكيف أرجع بالخُطى !

و امحي تجاعيد الحنين ! ..