يا بنت يالي تبي تعرفين مريالي
عبدالرحمن المضحكي
(البحرين)
يابنت يالي تبي تعرفين مريالي
حبلك ترى مايوصل مبتدى قاعه
عليك صعب ترى يابنت منزالي
صعب طريقي وتحذر منه اسباعه
بحري غزير وتكثر فيه الاهوالي
وشجاب اهل الفلا للبوم وشراعه
لفي الفيافي ورا حادي وجمالي
وخلي البحر حق هله للموج وصراعه
انا صعيب وصعب يا بنت مدهالي
اطا مواطي الخطر ونهيه في ساعه
اعشق نعم واتغزل واطرب البالي
واسرح بوادي الشعر والاذن سماعه
ومن اعتزابي اعينه واغدي والي
للي غدر به زمانه ومكن اطماعه ٠
اذا بقيتي امتخاني وخوض الاهوالي
ارقي باعلى البحار وثبتي الساعه
وشوفي زمن يدمج الاول مع التالي
وعقارب الوقت لي يا بنت طواعه
٠٠وقولي انا عاقل ولا بي اهبالي
ثم انطقي في الملا لك سمع وطاعه
