قزحيا ساسين

كلُّن

كلّ الناس ضيوف بالبيوت، لأنّا هيِّه بتضلّ، وهنِّه بيفِلّو.

سِرّو

اعطي بيتَك للضيف، ولا تعْطيه سِرّو.

أَكْلِه

الضيف اللي بْيِسْتطْيِب أكْل مَرْتَك، بْيِجي يوم وبيشوفا… أكْلِه.

معزور

الحَرامي ضَيف، بْيِجي غَصبِن عنّو، مش غَصبِن عنَّك.

جديد

البيت الجديد ضَيف بين البيوت، بَعدَين بيصير من أهل البيت.

عَتْبِه

غتبة البيت، بتشوف الضيف التقيل، وبتقول: “خّيّ، في حدا أتْقل منّي”.

لَ إلو

الضيف اللي معو مفتاح البيت، ما بيعود يدقّ.

مفتاح

الضيف مفتاح البيت.

يا بَيِّي

الضيف اللي تْعوَّد يقعد عا كرْستَك، بيقِلّو إبنَك :”يا بيِّي”.

سمّاك

ضيوف السمّاك رِيحِتُن سَمَك.

حِلو

حِلو الضيف متْل التلْج عالقرميد، بيفِلّ قبْل ما يدْفا مطْرَحو.

مِنْقِم

الضيف المِنْقِم بْيِزعَل إزا بالصيف ما شِعَّلْتِلّو المَوقدِه.

تاني

إزا ضَيفَك فَتَح الباب لَ ضَيف تاني، فَتِّش عا بيت تاني.

شبابيك

الضيوف شبابيك بالبيت، بيقْعَدو عالكراسي.

كلْبو

لا تعْزم الضيف إنته وعند اللحّام، تا ما يجيب كَلْبو معو.

عَمِّر

ما في أَوْجع من إنَّك تعمِّر بيت، وتعِيش فيه ضيف.

صَيبة عَين

نام قبْل ما يوصًل الضيف اللي بيصيب بالعَين، ولا تضلّ تاني يوم عم تِرْقي.

صالون

فيك تعَبّي الصالون تخوت، بَسّ لا تسأل لَيش الضيوف جايين بـ تياب النوم.

دَين

دَيِّن ضَيفَك مصاري، بيرِدُّن زيارات.

تقيل

الضيف التقيل اسقِيه قهْوِه، ولا تقِلّو إنَّك بتبصِّر بالفنجان.

حَمِّيل

إللي بْيِحْمل ضيوفو عالدرج، ما بيناسبو البيت العالي.

أنْبِيا

الأَنبيا ضيوف السما عالأرض.

ما فِي

بالسَّما ما في ضيوف.

رصيف

إللي بَيتو الرصيف، كلّ المارقين ضيوفو.

ما بتشْبَع

في ناس ما بتشْبَع إزا ضَيفا ما جاب زوّادتو معو.

آخر حجر

الضيف آخر حجر بْيِتعمَّر بالبيت.