هيك القمر
د. جميل الدويهي
هيك القمر غنّى لِكي
تا تفلْتي الشعر الحَرير
تا تفْتحي العروه اللي بعدا مسكّره
وجَوز الحمام يطير
ويطير العبير…
***
كان القمر قنديل
عم يْضوي عا سطح البيت
لمّا شافك من بعيد
كيف بتلبسي وبتِقْلعي…
واشتاق إنّو يفُوت عالبيت القمَر
تا يلمس رخام
اللي بعدو ما اندقَر
تا يسرق الفستان
يللي متل غابات الشجر
محْروق قلبو كتير…
بدّو يحمْلك ويطير
خلي الناس عنّك يسْألو
وينْقال: خطْفوكي الغجَر…
***
عمَّر لِكي خيمه
وعريشه فوقها
تا تشربو القهوه سوا
وما تضْجرو
محتال هوّي قال إنو عاقل…
وما تصدّقي…
قديش قبْلو عاشقين تنكّرو
تا يدخْلو بالليل
عا بيوت الصبايا ويسْهرو…
وهيدا القمر بيحبّ تفّاح الجرد…
وكلما قشِع زافك
بيمُوت من البرد…
روحي اسألي قدّيش
كذّب قبل منّك عالبنات
وبَوّس شفاف الورد.
***
بيرافقك عالدرب حتّى تقشعي
وبيسألك: يا بنت ليش مأخّره؟
ما يكون بالضيعه حدا
عم ينطرك بالليل حدّ القنطره…
وإنتي معي ومَنّك معي…
أحيان بتقولي:
أنتْ وحْدك قمر
أحيان بتكوني عنيده
ومن حياتي بتطْلعي…
ويا ريت لمّا بمرق بهالليل
بتفزّي من الشبّاك
حتّى بين ديّي تُوقَعي…
***
هيك القمر غنّى لكي
تا تنْعَسي
والتخْت يبرم عالهدا…
والحلم ياخد عالمدى…
وقبل الصبح ما يطلّ
يهْرب عالطريق
لا صوت عندو… وْلا صدى…
والسرّ ما يعْرف حدا.
***
(*) من ديوان “هيك القمر غنّى لعْيونك” (يصدر عن مشروع أفكار اغترابية عام 2019)
