الكويتي بندر عبدالعزيز الفدغوش… شاعر الحب والحياة
أمل ناصر
نشر الشاعر الكويتي بندر عبدالعزيز الفدغوش قصائده في مجلات وصحف وصفحات شعبية.
شارك في مهرجانات وأمسيات على مستوى الخليج:
١- مهرجان الشارقة للشعر الشعبي
٢- أصبوحات وأمسيات في دولة الكويت والسعودية والامارات والبحرين وعمان
فاز بالمركز الأول في: برنامج “عذب القصيد” (السعودية)، ديوانية شعراء النبط (الكويت)، قصيدة الوطن على مستوى مدارس ثانوية ( الكويت).
****
بندر الفدغوش
على ذاك الطريق اللي مشينا فيه من عامين
رسمنا كل أمانينا وضاعت به أمانينا
يا حلم العمر في آبه مع كانونه وتشرين
انا روحي بلا وصلك سفينة مالها مينا
انا قلبي مثل قبري عجز لا يسكنه شخصين
وتاه العمر من رجوة شفوفٍ ما تصافينا
انا طيرٍ فقد عشّه بعد ما راحوا الغاليين
وانا بيتٍ بلا ناسه غبار الهجر كاسينا
ولأنّي ما قدرت أنسى ولا اعرف سلوة السالين
على الذكرى ننام الليل وبالذكرى تصحّينا
رسمتك صورةٍ تبقى ولا تفنى مع الفانين
على لوحة سماوية تجسّد كل معانينا
على روحي ومن دمّي وتبقى داخل الضلعين
وفِي عقلي وفِي عيني وحاضرنا وماضينا
يا حلم العمر وغيابك يحد لموتتي سكين
يا كيف أعيش هاللحظة بعد وعدٍ نما فينا
يا كيف أسج عن طيفك وطيفك يسكن العينين
يا كيف أنام وثيابي على عطرك تودينا
تعزينا ليالينا وحلمٍ مات بالتكوين
وعلى موت الأمل والحب دنيانا تعزينا
