أمل ناصر

نجلاء سيد سعيد  شاعرة مصرية تعنى بالشعر العامي.

-عضو نادي أدب المنيره بالجيزة.

-عضو رابطة الزجالين وكتاب الأغاني.

-عضو مؤسس في التجمع المصري للفنون.

-شاركت في ندوات ثقافية.

– حصلت على المركز التاني في الشعر في إقليم القاهرة الكبرى على مستوى المحافظات، وعلى المركز الاول في مسابقة مهرجان نادي عمال شبرا التابع للهيئة العامة لقصور الثقافة، ونالت شهادات تقدير.

-لها تحت الطبع: ديوان “آخر محطة عشق”، وديوان  “مربع ناقص ضلع”، وأجمل ليالي شهر زاد (دراما شعبية).

 ***

قد الشوف

نجلاء سيد سعيد

أنا هااكتب اي كلام ع السطر

شخابيط بتعلم قلبي الصبر

 إتقطع النور من جواكم

فخرجت اكمل كل حالاتي برسم الشوف

 على نقطه ضي بيتسرسب من لمبة جاز

على حبة خيالات لملامح راسمه غريبه

لحبة طراطيش للأيام البكر الخارجه تلف

 خيوط القلب المتشعلق بحبال الكون

اناممكن اكون أو حتى مااكونش

 جواكم يشبه  لسكوت الليل

وقت طلوع الفجر على المجاريح

 جواكم عايش او ميت

 جواكم ديمآ مش فارق

ديما بنبص علي الدنيا بعين الشبعان

من بوح الوطن المدبوح

فارميت كل سنيني وهربت

لأخر درب اطبطب

 ع السكك الشبعانه هموم

على خطوه   تفكر

قلبي بحب قديم

 كان جايز إن الشط يطول النجم باإيده

ويسرح في الملكوت

كان جايز نجمة بكره تتأخر حبه

لحد الشمس ما تجري تحني شعورها

من ضي الفجر العاشق

 ضحكة ف خد حزين

 

 يسابق شمس اليوم الجاي

كان جايز الفكره الفكره مابينا تكون

 خطوط لتاريخ مكتوب من بوح الايام

المليانه شقوق

المشهد كان لازم يكمل

ويكمل روحه بخط الحب

  لحظات بتمر والمشهد مش نفس المشهد

 ولا عتبات البيت بتبوس خطاوينا بحب

 قعدتنا عليها وقت الليل

 واللمه الحلوه

على حبة عشق يدفو القلب البردان

على خوص لجريد بيطبطب

 ع الشجر المايل 

على بنت بريئه بتزرع جوه قلوبنا الخير

 وانا بحسب عمري

 باشوف  في عيون الخلق 

بيوت وحواري وإيد بتطبطب ع الايام

تمسح شبورة الحزن

اللي معشش فوق

كتف الدنيا وبتعافر

فاتدوب الضحكه وتصبح وهم

فاياريت الضحك يكون على قد الإيد

مش قد الشوف