سج القدم
السعودية- فيصل بن فهد
يا صاحبي لا عاد تشره على الناس
خل البشر كلٍ على كيف كيفه
نصيحةٍ خذها من الراس للراس
من تجربتنا فالليال المخيفه
من كثر ما شفنا من العالم اجناس
صرنا نشكك فالقلوب النظيفه
خرب على صدق المخاليق هلاس
و حنا بعد شفنا مع الوقت شيفه
اليوم كلٍ صار عباس فرناس
على الركايب موميات السفيفه
لا يزملك بفعوله ظعّيف الباس
خل العيون لبعض الاحياء كفيفه
تبي تواجه ناس ما فيهم احساس
و تبي تشوف اهل النفوس الظعيفه
والبوم لو تلقاه في وكر قرناس
يا كم شفنا بوم و الصقر ظيفه
و اليا نجحت بطيب في كل مقياس
فمحاربك يلقى المعادي وظيفه
و لا هو غريب ان بان في قريّب الساس
اكثر محارب للرجل من طريفه
يكفيك عرف اللي كسب كل نوماس
والا الهديفه خلها للهديفه
وان ظاق صدرك و ابتدا كل هوجاس
(سج القدم) ما هيب حاجه كليفه
دور خويٍ خوته تجلا الاعماس
و الجيب عط له لين تسمع و حيفه
مع عبلةٍ ما طبها كل عساس
دوبك تشوف ابها الجبال المنيفه
ينفعك مد الشوف مع جذب الانفاس
و صاحبك ينقى فالعلوم الطريفه
هذي وناسة من سعى للتوناس
يوم العرب ما يصفي الا النصيفه
