الشاعر المغربي الميلودي الوريدي… مرآة القصيدة الشعبية
أمل ناصر
الميلودي الوريدي، شاعر شعبي وناقد من الغرب ، خريج كلية عبد المالك السعدي بتطوان، نائب رئيس الرابطة المغربية للسرد الوجيز – القصة القصيرة جدًا.
****
الهجهوج المساوي عل الجرح داوي
الميلودي الوريدي
فْ واحد النهار هاجت رياح يّامي
وعاج الفكر وتهت فْ اوهامي
خرجت نمشي بلا قْبْلة
شفت لمة من خمسة ملمومة
يجاريها عجاج… صايكها ” كَناوي”
فْ اللبسة توام. لحمر صقيل ولودع مساوي
ظنيت لكناوي هاني
يميل مع هوا غيواني
ينقر عل الهجهوج من فرحُه حيت هواوي
كالي يا ودي:
طل ف بحري تلكاه مسكون بْ الهموم
ريحه ريح الشوم
واللي اسود بحالي
عمره ما يتقن العوم
اغنايا من الآه نغرزه ف الكلب
يسيل بالكرحة صديد
يقصف العمر
ويقصر الحبل المديد
اللي فحياته ما عاش يوم جديد
ولا شاف فرحة ف نهار العيد
كيف يفكر ف الدنيا يعمر
ويتمنى بحال الناس عيش رغيد؟.
شوف هجهوجي
كيف حالي الغريب حفرته
بشوقي لبلاد جدودي رصعته
يفكرني بحكايتي
يعيش معايا تغريبتي
يصنع فالوحدة لامتي
حيت جلده من جلدي
والآه منه تتكلم ف عماق افادي…
ههههههمممممممم هههههههمممممممم
والقرقبة ؟
احديد فْ احديد
ابحالي صنديد
كيفها كيف السنسلة
فعنق العبيد
شاداهم لتراب الأرض
عاكَداهم فْ ضفاير السما
بين فضا وهوا
يلعب بيهم ريح اعنيد.
القرقبة سمعها تسمعك
ارواها ترواك
تلوح من لوعتها
على صهد ليعاتك،
تعكَد نارها برمادك
يتعانقوا اجوادها مع اجوادك
