بتنفَّس حُبَك…

لميا أ. و. الدويهي

 

قالوا لبنان مقهور  

قلبو عم يحترق موجوع

والحربة اللي طعنتو بين الضلوع

خلِّت شرايينو تنزُف أرز وشوح 

وأشجارو بين اللِّهبة واللِّهبة تنوح…

وطلِّت إمّ النور

تتفقَّد اولادها بوطنها المجروح

وتنادي بالصوت المَسموع

بعمق أعماق النُّفوس:

«تكاتفوا وتضامنوا وأنا معكون

بْفيض قوِّة السَّما عليكون

حتَّى صوت الرَّب 

يطفِّي لهيب النَّار بإيدَيكون»…

مكتوب علينا يا لبنان

نعشقك أبعد من الجنون 

وأقرب من الرُّوح…

يفنى العمر وتنهَدر منُّو إيَّام

بس يضلُّو ترابك الممجّد

بدعسات الربّ وإمُّو، عليان…

إنتَ رسالة الأكوان 

وما بتعرف غير تنقل للعالم السَّلام…

بصلِّي ما تغفى عجفونَّا الطلبات

تا تتوحَّد دقَّات القلوب 

وتتجدَّد نبضات الجرود

وتزهِّر فروع فروع

بإيدين خضرا، 

بالإيمان معطَّرة 

أنفاسها ورود

بتطيّب المعمور

تا يبقالنا لبنان

لآخر الزَّمان

جنِّة الله والإنسان…

16- 10- 2019