خاطر مكسور
ندى بو حيدر طربيه
رح خبّرك عن خاطري يلّي انكسر
متل الرحيل الخيّب ظنون الغجر
متل النهار الخيّب ظنون القمر
رح خبّرك من بعد ما الحبّ انطوى
صرت الخريف الخيّب ظنون الشجر
صرت الوعود الخيّب ظنونا القدر
رح خبّرك من بعد ما مات الهوى
كيف العما بيخيّب ظنونو النظر
وكلما بتسأل خاطري يلّي انكسر
وكرمال تعرف ليش بطّلنا سوا
كتبني الأمومه المات طفلا المنتظر
حبسني دمع من قبل ما يبكي انتحر.
