وجَّك مَطبوع عأرضنا…

  لميا أ. و. الدويهي

 

بشم عطرَك

وبمجِّد إسمَك

بكل حبِّة

من ترابات أرزَك…

نسمات روحَك

اللي عم ترفرف،

بخُّور بيعطِّر سمانا

وبيتغلغل بمسامنا…

أرضنا أرضك،

إسمها قلبَك،

تراباتها تقدَّسِت بدَعساتَك

شجراتنا سَنَدت جِسمَك

وغصونها فيِّت راسك…

ونحنا لليوم

ما عم نعرف قداسة لبنانَّا

المجبول بعرق محبتَك

ومتوهِّج بشمس روحَك

الحالل عنَّا

وعم يمجِّد إسمَك…

اليوم منرفَعلك الصَّوت

حتَّى تفتَح ذهنَّا لصوتَك

وفكرنا لكلمتَك

تا بالحق نشهد لإسمَك

وبالعمَل نتمِّم مَشيئتَك

وبالعَين نقشع مَجدَك

وبالإرادة نحقِّق رجانا

وبالثَّبات نوحِّد خطانا

وبالثِّقة بحضورك فينا

وبيناتنا وعأرضنا،

نغلب الشَّر بالخير

ونجاهد ونُصبُر،

تا يوعى فينا سلامَك

ويعمّ الفرح قلوبنا

لمَّا بتتوحَّد صلواتنا

ونحيِّد بإرادتك المجيدة

كل غيمة فيها عتمة

بتفصلنا عن وجَّك القدُّوس

المَطبوع بكل شبر

من أرض العَروس…

(12/ 1/ 2020 )