إبليس، كورونا

غاندي بو ذياب

 

مْحابيس صُرنا .. هيك بَدّو بْليس

وجفون عينينا مَنَعنا نفَرفِكا

تذكَّرت أول ريق بدموعي ذِقِتْ

تا صْحيت من مَوتي وفِقِت

جَمِّع قُصَص .. من ذكرياتي فَبرِكا .

وشو همني ان ولعت حرب

واستَنفرو بلاد الغرب ..

شفافا بِ ذاكرتي خمُر  ..

ورموشها مْتاريس

ومالي قلب شِمّ الهوا

وما عود شوفا وإترِكا ..

ما العمُر شمس معَلَّقة بخَيط الوقت

بتشبه حياة مْغَلَّفي بقشرة دَوَا

حلوي ومُرَّة ، وما منقدر نِعْلِكا .

ولمّا القدر  بجيوش وجْوَاسيس

عَلاَّ صبيعو وحَرَّكا

هَجْمِت كأنَّا ذياب وجْوَاميس

تْعَبِّتْ بِ جِلد الأرض تا تْفِشّ الڤِيريس ..

ونحنا عا نقطة مَيّ ياما مْنِعبِكا .

وِرمِتْ إيدَينا ، وما قدرنا نشبِكا

وسطح الحلم صارلو زمان يْنِشّ ..

يِدلُف وَجَع ، وينَقِّط كْوابيس

وكِترِة صريخ صْوات ما إلها حَسيس

هَبّ الجمُر عا مخَدِّة رمادو اتَّكى

ناسي حَرارِة هالزمان يْقيس ..

هَوني مَلاك الموت صار قدّيس

من بعد ما الشَيطان لَ ألله اشتكى .

20 -3- 2020