الشاعر السعودي فهد عيد الجعيد… “مرتاح”

فهد عيد الجعيد، شاعر سعودي

شارك في أمسيات ومهرجانات كثيرة ونشر قصائده في مجلات وصحف تعنى بالشعر النبطي

يحضّر ديوانين: “سكرة غلا ” و”فنجان قهوة” .

مرتاح

واعيني اللي تنتظر غاليٍ راح

واقلبي اللي مالتفت للعباير

واراسي اللي عاش ضاري باالارباح

وامسى يحسّبها بأقل الخساير

لو صاحوا العقال من هم ماصاح

كبير لو انه يشوف الكباير

واللي يشيل الحمل كله ولا طاح

ان طاح ماترضى عظامه جباير

بابٍ قفلته مابيفتح بمفتاح

قفله مثل فتحه على القلب جاير

لو ان طب الهم بيدين جراح

سريت له ولا اسهر الليل حاير

ولو انّها مابين شامت ومزّاح

مابجتهد فيما تكن الضماير

ولو انّها بخيول وسيوف ورماح

من عاش مايسمع ياكود البشاير

يامادح المخلاب أنا بمدح جناح

لولا الجناح الحر ماهوب طاير

ياليل نور الصبح لابد ينباح

ماضقت من شيٍ على الناس ساير

جرّيت لي موّال بأسباب مسباح

وش حال من جرّت لحونه سجاير

وليا نشدوني قلت بالحيل مرتاح

ماني معلم وش حصل ويش صاير

ياللي تمنون الهوى مابه افراح

واحظ من يطلع با اقل الخساير