مِنبر القلب

لميا أ. و. الدويهي

 

المَوجة عالية 

وأنا ما بدِّي إِغرَق

لأنِّي بتنفَّس حُبَّك…

مِّد يمينَك

وكِفّ إيد الشرّ عن أرضَك

ما في قوّة بتوقف بوجَّك

لمَّا منتِّحد قدَّام عرشَك

وبثقة الأبناء منصرَخلَك

تِرحم شعبَك وتحلّ مجدَك…

عمنبر القلب بوقفلَك

ومن هونيك بندَه لحبَّك

وبنادي بالصَّوت العالي

وبناجيك يا أيُّها العالي

حتَّى توعى بكل قلب مِحتجلَك

طفيو شمعاتو من بردِ الإيَّام

وتحجَّر من قساوة الأحمال…

بغْرُف من بَحر الرَّجا

تا يزهِّر السَّلام

يعبِّي الأفق والمَدى

ويطال السَّما…

وحدو صوت الإيمان

بردّ للإنسان الإرادة بالحَياة

وبيصبّروا عالأحزان

وبيثبّتوا بأرض الأجداد

اللي صانها الله عمرِّ الأزمان

المدفوع حقَّها تضحيات

المرويِّة بصلاة البيَّات

ودموع الأمَّهات

وصرخات الولاد

وآهات الشابَّات

اللي لبس حبيبون حِلِّة الغياب…

   ٣٠/ ٨/ ٢٠٢٠