احتفال
سليمان بختي
شو بيعملوا العصافير ع بكرا
بيغنوا بيفيّقوا بعضهن
بينفضوا الحبر عن جوانحهن
بيونسوا الدني حولهن وحواليهن
بيشوفوا الصبح جايي من بعيد
وبيهيصوا وبيفرحوا
جايي ومش مصدق حالو
رسول الشمس بيلبقلو
بيفرشوا الأغاني قدامو
وبيعملوا من الأغصان أقواس النصر
ولا مرة بيتأخروا
وبس تقوى الشمس شوي
أو تكتر الضجة حواليهن
بيفتشوا عن وراق الشجر
وبيتخبّوا ومرات بيناموا
وبيصيروا يحلموا
وبيسألوا مدري شو حامل معو
جديد جديد خلنج
وبيربوا الأمل
وحدهن بيعرفوا
شو يعني “طل الصباح وتكتك العصفور”
وحدهن بيعرفوا
أنو هالأبيض الكبير
ما بيشرق إلا على
صوت الأغاني
وهني كل يوم بينطروا
وبيتمرنوا على الأوف والموّال
وهوي ما بيخلف الوعد
بيطلّ متل وجه السعد
بيمرق على كل البيوت
وبيترك وراه سحبة نور
وبيرمي على كل شباك
بلبل أو عصفور.
