قصيدة الياس زغيب في احتفال توقيع كتاب يسرى البيطار “أرتدي أوراق الخريف كي لا تموت”

د. الياس زغيب

يبقى الشّتي تَ يغسّل تياب الخريف

 

ينشر كمام الغيم ع حبال الرّصيف

والرّيح تدبك، والغصون الواقفه

 

تدرّي الورق، والنّهر ما يشبع زقيف

وتمرق قصيده تلمّ نظره خاطفه

 

يوعى البرق… عَ تلالنا يعمل نَزيف

والنّار ترسم عا حيطان العاطفه

 

صورة مرا، وخيال مارق عَ الخفيف

تتكي العواصف متل حلم النّازفه

 

تحفتر خيالا عَ الوحي تَ تشوف كيف؟

 

بين العواصف والقصيده العاصفه

 

مش كلما في عاصفه بعدا صحو

 

ولا كلما في عاصفه قبلا خريف…

كلما لبسْتِ حرفِك الموزون

 

بيخضرّ لون الحلم بالطّربون

وإنتِ؟ متل قلبِك وقع بالـمَي

 

وصنّارتك ع الموهَبِه بتمون

قلبِك متل زهّر دفا بالحي

 

وشِعرِك متل نَيْسَن صبح كانون

متل العمر زاح البرادي شويّ 

 

شاف السّما جرّه ملانه عيون

وشِعرِك ندي لترويقة الحسّون

 

وضحكة طفل لـمّا الطّفل بيكون

مَيله ملاك، ومَيلتَين جنون

 

ولهفة مرا بتحبّ… ما بتخون

وأرزة وحي بتراب مار مارون

 

صوتِك متل غيَّم مسا كفيفان

طلعت الغيمه! بخّروا الرّهبان

 

نزلت عيانِة شِعر ع البترون

بتلبس ورق تشرين تا مَ يموت

 

بيضحك رماد الصّوت بالصّوره

حرفا ربيع الحبر علّا بيوت:

 

مدماك دهشه، وسقف وجسوره

”يسرى” اللّي عبِّت جرّتين سكوت

 

خلف الصّدى، ع الهمس مندوره

بتوب الإلهه عَ الشّعر بتفوت

 

بصحرا الورق بتفجّر نهورا

والشّعر أدونيسها المكبوت

 

لـمّا الخريف بدمعتو يزورا

بتمدّ صوتا متل عشتروت

 

بترجّع من الموت أدونيس

 

وبتضيّف الإيّام أسطوره!

البترون في 7/ 11/ 2026