كتير وقليل
قزحيا ساسين
نجّار
ما حدا قدّ النجّار بيعرف إنّو التخوت كتار والنوم قليل.
قلم
قلم الحمرَه اللي بْيَعرف كتير عن الشفاف، ما كَتبلُن ولا قصيدِه.
عقل
كترة العقل متل قلّتو.
دموع
لا تتّكل ع دموعك، وتقول:” عندي مَيّ كتير”.
مفاتيح
يللي بتقلّ بوابو بيكتِّر مفاتيحو.
حزن
الحزن لْ إلو هيبِه، بيقعُد بالدمعَه الكتيرِه مش بالدموع الكتار.
ملَك
إزا ما الملك شاف بـ عيونو، رح يعموه عيونو الكتار.
بالبال
كلّ اللي بيمرقو بالبال بيوقَعو: كتار اللي بْيِجو عالأرض، واللي بيجو بالقلب قلال.
مش هيِّن
ألله قلّل حَكي، تا ما الناس يعرفو وَجعو ويحطّو إيدن عا جرحو.
بشر
من قبل ما يصيرو البَشَر كتار، كانو… مش قلال.
خَميرِه
إزا صارو كلّ الناس خميره وقلّ الطحين، ما بيعود الخبز ينبلع.
سكاكين
الدني فيا جروح أكتر ما فيا سكاكين، لأنّو السكاكين مش متل الجروح بيخلّفو.
قدّيس
ما زِعل القدّيس اللي أكَلّو الجَرَد زرعاتو، بسّ ما تمنّا يكون الجَرَد أكتر.
حسابات
كلَ ما عربشنا عن شطّ البحر طلوع، بْيِكتَر ألله وبتقلّ المصاري.
ساعات
بـ محلّ الساعاتي، تطِلّعْت بالساعات الكتار، وقلت: “قدّ ما يكون الوقت كتير، ما بيدور عْلَيُن دْواق.”
فقر
بيضلّ الفقر أكتر من الفُقَرا بالأرض.
ورد
إزا كِتر الورد ما بيقلّ العطر… بتقلّ قيمتو.
حبر
الحبر اللي بدّو يكْتَر، بْيِطْلع من القلم عالورقه.
خبز وجوع
الخبز بالدني أكتر من الجوع، بسّ الجوع بيقشع مليح وبيروح لَ عند الناس، والخبزطلع من بطن أمّو لابس عوينات سميكِه.
فيران وبسينات
كانو الفيران قلال قبل ما يكْترو البسَينات اللي صارو يربّو فيران… تا ما يموتو من الجوع.
ما في متلا
لمّا صار الحلا كتير، صارت البشاعَه تمشي عا روس صابيعا.
نيّالَك
ما كانو أعداءك كتار، لَو ما كنت كتير.
غَيم
لا تعلّم رموشك يرفّو فزَع للغيم الكتير: ياما بيكونو الغيمات كتار، ونقاويط الشتي بينعدّو عالصابيع.
أُبَر
يللي عندو أُبر كتير، ما بيعرف بـ أيّا إبرِه بدّو يرقّع تيابو.
عصافير
لمّا بيكونو العصافير قلال والصيّاده كتار، العصافير بيرجعوبالسلامِه … مش الصيّاده.
غربال
يللي بقيو أصحابو كتار، بيكون غربالو إلو عين تقشع، وما إلو تمّ يحكي.
قفاص
العصافير اللي ما فين قفاص قلال.
عصي
كترة العصي بتفركش العميان.
