مَنَّـكْ حِلُـو

د. يسرى البيطار

مَنَّـكْ حِلُـو..

 بَسّ الحقيقَـه

 بْـقلْبْ قلبي مْـغيَّـرَهْ..

لابـسْ قَميص مْـنَهْـنَـه وْهِلْكـانْ..

مِتْـلِ الشّتِـي بْـنيسانْ..

 مِتْـلِ الزعَـلْ تِـعْـبانْ..

مِتْـلِ الحلِمْ مَوجوعْ..

وِالناسْ قهْـرِ مْـسَيَّرَهْ…

مَـنَّكْ حِلُـو

 بَسّ الحَقيقه مْـغيَّـرَهْ..

بْـعِينَـيْكْ آخِـدْنِي رَهيـنِه..

بْـإيدَيْـكْ كِلِّي

وْكِـلّْ بَهْـرجْتـِي عَجيـنِه..

وْصَـوتَـكْ إذا بيـحـِـنّْ..

عَقلي الْكْـبير بْـينْطِـفي..

 وِبْـجـنّْ..

وِبْـعودْ طِفلِـه مْـحَيَّـرَهْ…..

قَـوْلَـكْ حِلُـو؟

أو مِشْ حِلُـو؟

كِـيفِ النِّـدِي بْـينزِلْ عَلى شَعرَكْ ..

رَيْـتو هُـنيكِ بْـينْـحِفِـرْ قَبـري..

وْرَيْـتو يْكونِ بْـغـرّْتـِي قبـرَكْ…

أيْـشَكْ حِلُـو…..

وْأركُـضْ أنـا خَـلْفَـكْ..

إنْـت الصَّبـِي مَعْ بَكْـرِةِ الخيطانْ..

وِبْـصيرْ قَصْبات وْوَرَقْ..

فَـوْقِ النّجومِ مْطَيَّـرَهْ..

رَحْ مُـوتْ قِدَّيْشَـكْ حِـلُو …

وِبْـنامْ..

بْـحُطَّـكْ عَـقلْبي حْـرامْ..

وْإرجَـعْ لَـبَيْتِ الأهل بِـنْـتِ زْغَـيَّـرَهْ…..