حاملات الطيب ع كتاف الشعر
مارون أبو شقرا
مفتوح جرحك يا ورق،
شاعر مرق
نزّ الوجع كمشِه
قداس عَ الغيم اندلق … أوعا الحبق ،
مطرح مَ عم تمشي …
قبل الشعر في موت .. بعدو شو فرَق؟؟؟؟
هرّ الصخر جوري عَ كترة مَ احترق…
***
مطبوع : “معمرجي”.. اللي بيشوفو
قريو الختم عَ بصمِةْ حضورك …
باني قصر أهل الحلا ضيوفو ،
تصفّ مداميكو حسّ ت يطوفو ،
متل بيّك .. إيدك : زهورك !!!
شختر حجر لبنان عَ كفوفو
وحفتر حزن هالأرض بشعورك !!!!
قطّب بكحلِه جرح شاقوفو،
وجرح الورق بتقطّبو سطورك !!!!
***
كتابو جبل عالي عَ كتفو قفّتين:
بعلبك الخبز وصور خمرَه يرفعا !!!
العنوان قصّ الروح ، شقّا ضفتين،
بالنص نبعَه.. تمّ بعل يشعشعا …
النجمات لولو انشكّ بين الشفّتين
بكعب النهر، آيات ، غوص وجمّعا …
الدهشه غمق نطره .. قاديشا … حفّتين ،
تزرك مجرّه وبعد فشخه بتبلعا !!!!
وت الصبح ما يزحط ع قلب الدفتين،
طيورك قوافي نار… هتلك رفتين…
كلما انطفت هالشمس قفله تولّعا !!!!
***
دقرتو كتابو ، متل شي غبّيت
فرحة شفاف الفجر هنّي وراجعين
باقة صبايا بالسواد مزيّنين …
بتقول صفحه بالحبر غطّيت!!!
بتدوق طعمة ضو ناقح عَ السنين !!!…
جرح القبر مفتوح .. عابق ياسمين…
كبّو عطورن عَ الزمن .. شمّيت …
مدّيت إيدي عَ السطر … تشّيت ….
دقّو صبيعي بالنقط .. حسّيت
مطرح مَ في مسامير كانو غارزين …
***
(*) ألقيت في حفل توقيع ديوان “جرح الورق مفتوح” للشاعر إميل فهد – ذوق مصبح – مدرسة سيدة اللويزه – 27/6/2019