الزمن
أمل ناصر
الزمن متل البرّايِه
بْيبٌري العمر شوي شويْ
هيدي هي لِ حْكايه
ما في رحمِه ما في خْطيٌ
شمس بتفضح خط العمرْ
وِخَط بيتخبّا بالفَيْ..!
الزمن بيمرق عَ غفلي
ما بْعُمرو بيحسُب حسابْ
بيتخبَّا بطفل وطفلِه
شوي وبصيرو شيَّابْ
بيركض فجأة.. مدري كيف
كيف بيكرُجْ كرجة مَيْ؟
هيدي هي لِ حْكايه
ما في رحمِه ما في خْطّيْ!
غدار الزمن قهّارْ
ما بيرحم ما بيتبرطل
سنين بتمرق متل نهار
لا بيوقف..لا بيتعطل
والساعة لما بتدق
مين هوي لْ رح يبقى حَيْ؟
بيركض فجأة مدري كيف
بيكرج يكرُجْ كرجة ميْ
شمس بتفضح خط العمر
وخط بيتخبَّا بالفيْ..!
