مبروك يا بنتي
جوزف الجميّل
مهداة الى ابنتي سمر وقد نجحت في الثانوية العامة وحازت رخصة قيادة السيّارة برتبة جيّد، في الامتحانين، وباشرت امتحان الحياة:
مبروك يا بنتي
بعتزّ مين إنتي
للعزّ مشتاقةْ
احمل إلك باقةْ
حصن الصلا صنتي
مبروك يا سمرةْ
جْمعْتي الوفا غَمرةْ
من نورك الصافي
يغفى على كتافي
ويموج بالخمرةْ
ليل السما خمّارْ
بيسكّر السمّارْ
بتموج نجماتو
بتقول كلماتو
بكتاب كلّو قمارْ:
إنتي الحلا والغار
من بيدرك بيغار
لحن الوفا لْ غنّى
اسمكْ بموطنّا
خلّا الكبار زغارْ
مبروك يا بنتي
كلّ المنى إنتي
يوم ل نجحتي صارْ
صار الهَنا إعصار
والعمر لوّنتي
