عَلِّي جبينَك…
لميا أ. و. الدويهي
تَعَّبوك؟…
ووزِر خطيِّتون حمَّلوك؟…
ما يهمَّك يا جيش بلادي
إنتو كلكون اولادي وإخواني…
علِّي جبينَك وما تخاف!
نحنا فيك منرفع الرَّاس…
مطرح ما بتدعس بينباس
والغبرة اللي عتيابك
أكبر إثبات،
إنَّك عأرضنا سهران
تا تغفا عيونَّا بأمان…
لا ترشّ دموع
وتقهر أكتر شعبك المَوجوع،
هوِّي حدَّك،
معَك وإلَك،
لأبعد من الدُّهور…
وتحت راية
«شرف، تضحية، وفاء»
بيحلف يَمين الولاء،
تبقى شعلة حبّ لبنان،
وأرزو العليان،
أمانتنا من ربّ الأكوان
ومن بعدو الأجداد،
النُّور اللي بيشعّ بليالينا
وحَدّ السَّيف اللي بيحمي أراضينا
والوحدة المغروسة بقلبنا وضميرنا
وبتسري حَياة بعروقنا وشرايينَّا…
