كيف بكتبك؟…
لميا أ. و. الدويهي
كيف بكتبك وأنا عم حسَّك؟…
كيف بحسَّك وأنا عم عيشَك؟…
كيف بعيشَك وأنا عم إتنفَّسَك؟…
كيف بتنفَّسك وأنا عم حبَّك؟…
كيف بحبَّك وأنا عم إعشَقَك؟…
كل يوم معك،
هوِّي فجر جديد،
حامل بطيَّاتو تلاويح
بتردني للذات،
بتنفحني حياة،
بتسرقلي اللحظات،
بتملِّيني حكايات
بعدها عم تزهِّر
جوَّاتي ألحان…
… لمَّا بتمضى الأوقات،
وبينطوى الحب ذكريات،
منفتِّش عنُّو بدفاتر الإيَّام،
منكتبو روايات،
منغنِّيه موشَّحات…
… بيوت الأشعار
الحكايات والأسرار
بيختموا عماضي كان
عأحلام مرِّت بالبال…
وإنت؟…
إنتَ وجود
إحساس مَلموس،
بعدو عم ينبُض حضور…
إنت روح عم تنعش روح،
عم يتلاقوا
عدروب دروب
حتى يكتبوا
سوا هالوجود…
١٣/ ٤/ ٢٠٢٠
