مطرح ما نكون
لميا أ. و. الدويهي
لمَّا بغِلّ بأحضانَك
وبتخفُق بالحبّ نهداتك
بتتغلْغَل الرُّوح
بعمق الرُّوح…
بوسع الكون بتصير…
بتتمازج الأحاسيس،
بتتعانق،
وحياة بتصير…
هونيك بتتراقص نغمات،
بتعزفها أوتار،
بتخلِّدها أشعار،
خلقت بلحظات،
زَهَّرت بالعمق آهات،
رَسمِت للوَجد واحات
ما بتحِدَّها مساحات،
بيتلاقى فيها العشَّاق
حتَّى وهنِّي بعاد…
إنت وأنا
بالأَوصال متِّحدين…
مطرح ما نكون،
بصمت السُّكون
أو ضجيج الوجود،
هالروح بتنادي المعشوق
بتناجيه،
بالغياب أو بالحضور…
وفيه بتكون…
وشو بيبقى من الروح،
من بعد ما نروح
غير الأثير،
اللي فوق المحسوس،
بيغنِّي لحن الخلود…
١٧/ ٤/ ٢٠٢٠
