مين قلّك يا موت
سليمان بختي
في ناس ماتوا شويّ
وفي ناس ماتوا كتير
وفي موت شاف الناس هاجمين
قلن رجعوا بعد بكير
وفي ناس وقفوا بوجه الموت
وربحوا حرية وبلاد وغار
وفي ناس وقعوا واستلقّتن الحجار
وفي ناس صاروا وردات الدار
وفي ناس صاروا صورة معلّقة على جدار
وفي ناس وقعوا متل ما بيوقع الطفل بالسرير
ومتل ما بيوقع الهمّ بحضن الكبير
وفي ناس نَطروا الموت متل مسك الختام
وغنّوا: غِبْنَك يا عُمُر ولّيت/ طار الحمام غطّ الحمام
وفي ناس راحوا لعندو وفاجأوه
غيروا العادة والتاريخ وبكّوه
وفي ناس ناموا وما قاموا
وما عرفوا الحقيقة من المنام
وفي ناس راحوا واخدوا معهم المكان
وناس راحوا وقالوا الموت محطة وراجعين
وناس وصلوا للموت وشافوا اعمارهن
متل طير بسرعة مرق
وفي ناس تركوا للموت كل شي ما بينفع للحياة
وفي ناس ما راحوا ولا اجوا
سكنوا قلوب وربك ورب قلوب
وفي ناس شافوا الموت
فراشة عم تشرنق حرير
مين قلك يا موت
انو في أصلاً حياة أو موت
ومين بيعرف أي وجع أصعب
ما هني غرفتين وباب وخيط رفيع
مين قلّك يا موت
تعبّي من دمع العين
لتسقي النهوره والبحور
وتروي عطش الدهور
وتخلّص العالم من طوفان الشرور.
