غنَّيت حُبَّك…

لميا أ. و.الدويهي

 

غنَّيت حُبَّك

من لمَّا لَحنَكَ

تْغَلغَل جوَّاتي

ولِقْيِت كلماتَك

مَسكنها بأعماقي

وخَرَقِت نَغماتَك فؤادي

وراقص نَبضَك أنفاسي…

سكَبت روحَك بروحي

نَسَجت خيوط

وحَّدت وجودنا بعهود   

وهوِّي خجول،

بعدو بالأفق عم بيلوح…

حلَّيت بعمري الأنا

اللي كانت بعدها بالفنا

عم بتناديك للهَنا…

طلَّيت من المَجهول

وصِرت إنتَ المَعلوم

اللي بداوي جروح

كل ما بتتعانق نظرات العيون…

حُبَّك ما بيلغي تحديات

ولا بغيِّر سؤ نيَّات…

حُبَّك بيحيي الذَّات

بِلوِّن لحظات

محَدَّدِة بسواد إيَّام…

بيفتح المدى عآفاق،

مطرح ما بتبتدي

بيخلق كَون ما بينتهي،

منصير فيه ناس جداد

كل ما غرَّد قلبَك بقلبي

وردّ الصَّدى بقلبَك حياة…

٢٧/ ٧/ ٢٠٢٠