شو صعب

لميا أ. و. الدويهي

 

شو صعب يقطش الدَّرب

رفيق الدَّرب…

شو صعب يترك كل شي

معلَّق وراه ويمشي…

شو صعب الأمل

لمَّا بيتحوَّل ألم

شو بتصير توجِّع الغمرة

لما الحضن اللي كان يحويها يتركها…

شو بتوجِّع الضحكة

اللي بتفقد اللي كان ينطرها…

شو بيأذي الفراغ

لمَّا بعبِّي الدَّار

وبيصيروا الأحباب

صورة بهالدَّار…

شو صعب الإنسلاخ

عن اللي كانوا وبعدون كلّ الدِّني

ومن بَعدون ما عاد في شي حِلي…

شو صعب تفلّ

وحدِّي ما تضلّ

شو قاسي الفراق

لمَا إلَك بشتاق

وكيف الشَّرخ بيشلِّع النَّفس أجزاء

وبيكسر إنسان ووراه إنسان…

وبهالمعمعة وقساوة الخسارة

والدَّمعة بيناتون محتارة

بكل ثقة، بتوقف الرُّوح

بالرغم من الجروح…

الموت مش نهاية حزينة

الموت بداية جديدة

غريبة عن واقع الناس

لكن فيها الإتحاد مختلف وبلا قياس

واللي بيعرف بالإيمان

بيشرِّع الابواب

بيبني مع الأموات الأحياء

علاقة فريدة ما فيها أوجاع

بتستحضر الأحباب

بالرغم من الغياب

وبيملك ساعتها الرَّجا

عكل قلب للربّ التجا…

٢٨/ ١/ ٢٠٢١