ساعة رمل
سليمان بختي
مبارح انا شفتن
قاعدين بزاوية الخيمة
بردانين بيرجفوا متل قص المسامير
بيكتبوا رسايل لـ الله
وبيدفق شتي ورعد وزمهرير
مبارح انا شفتن
قاعدين كأنو الزمن واقف
حاطين الهم بالجرن
كل واحد خايف
عارف مصيره وشايف
آخر الطريق واول الحزن
مبارح انا شفتن
طلعوا بالزورق وسحبوا
ما اتطلعوا وراهن
ما ودّعوا حدا
رشوا على وجه البحر نجوم
شوية للمات وشوية للنجاة
مبارح انا شفتن
واقفين حول السرير
الاب مريض ويا دوب يتنفس
والام بتبرم عحالا متل شمعة الريح
والاولاد واحد يهز السرير
والتاني يحاجج المصير
مبارح انا شفتن
رايحين عالمطار
والدمعة جامدة بعيونن
البي قال: الحمدلله سفّرنا الصبي
والام حطت حجرة بقلبها
كلما بتحن بترشح دمع
وبتقول ما اصعبك عالقلب يا يوم السفر
مبارح انا شفتن
راكضين ورا ساعة رمل ورا الامل
وكلما خابوا بيعاودوا الكرّة
حتى صدّقوا انو هيدا مش امل
مش امل بالمرّة
هيدا وهم مغطى بقشرة امل
هيدا عمر بيجي مرّة وبيروح بالمرّة.