من ذكرياتي الإعلامية…حكايتي مع الفنان”ابو ملحم”،وكيف اخترت سلوى حداد ودرّبتها لتلعب دور”ام ملحم”          

 نبيل غصن

 باوائل الستينات كانت اذاعة لبنان في بداية نهضتها الفنية، وكان الها مستمعين كتار لانها كانت الوحيدي، وكان التلفزيون ببدايتو وما فيه برامج، ولا اجهزة تلفزيون متوفرة بكتره بالبيوت.. لذلك استقطبت الاذاعة بهاك الوقت، عدد كبير من الكتاب والفنانين.

من البرامج اللي كانت تجذب المستمعين، برنامج” صباح الخير” اللي كان يكتبو ويقدمو الفنان اديب حداد بشخصية “ابو ملحم” وكانت تلعب في بداية تقديم هالبرنامج دور”ام ملحم” الفنانه ليلى كرم، وكنت انا اتولى اخراج تلات حلقات منه اسبوعياً ببداية مشواري الاعلامي.

وبتفاجئنا بهوني يوم ليلى كرم بغيابها عن المشاركة بتسجيل البرنامج وبتسافر بدون ما تعلمنا، واضطريت استعين باكتر من ممثله لتلعب دور”ام ملحم” بالبرنامج، لكن ولا ممثله نجحت بتأدية الدور، خصوصي باللهجة القرويه اللي بيتكلم فيها ابو ملحم …

اخيراً اقترح عليي اديب حداد انو اسمع زوجتو السيدة سلوى اللي ما كان عندها خبره مسبقه بالتمثيل، لكن لهجتها مماثله تماماً للهجة زوجها… وافقت انا بالطبع وتوليت تدريبها عدة ايام على طريقة التمثيل والاداء والتلوين والوقوف قدام المايكروفون…

ومع الوقت مشي حال سلوى حداد ونجحتْ تماماً بلعب دور ام ملحم اذاعياً وصارت مع زوجها اديب حداد”ابو ملحم” يمثلان الثنائي المعروف بـ”ابو ملحم وام ملحم” .. وبتذكَّر انو  بهاك الوقت كان برنامج “صباح الخير” وبرنامج “بيفرجها الله” يقدمان يومياً، مداوره، وحصد هالبرنامجَين التنين اكبر نسبه من المستمعين للاذاعه ..

وبعد مده .. كان التلفزيون بدأ يستعد لتقديم برامج وتمثيليات محليه… سألت اديب حداد اذا كان بيرغب يقدم برنامج وشخصية “ابو ملحم وام ملحم” بالتلفزيون؟ ووافق اديب حداد بفرحه كبيري وقللي: ايدي بزنارك …

اتصلت بمدير البرامج بالتلفزيون صديقي عز الدين صبح، وسألتو اذا كان بيحب يقدم برنامج تمثيلي بشخصيات ابو ملحم وام ملحم؟. رحب عز الدين بالفكره، شرط يشوف حلقه تجريبيه من البرنامج… وهيك كان، وانطلق برنامج “يسعد مساكن” بالتلفزيون، وقدرت سلوى حداد تسجل نجاحها تلفزيونياً متل ما سجلتو اذاعياً … وحصد برنامج “ابو ملحم وام ملحم” التلفزيوني شعبيه كبيري ما حصدها اي برنامج اسبوعي بهاك الوقت، والناس لحد اليوم بيتذكرو هالشخصيتين الاسطوريتين.. وصار اسم “ابو ملحم” مرادف للتوافق على السنة الجميع.

وبتذكّر انو سلوى حداد كانت تقللي دايماً: لو ما اخترتني انتَ للعب شخصية ام ملحم ودربتني بغياب ليلى كرم، وشجعتني ودربتني كيف اوقف ورا المايكروفون مثّل، وكيف يصير عندي ثقه بنفسي، ما كنت اليوم “ام ملحم” المعروفه، اللي حبّوها كل الناس مع شريك عمري “ابو ملحم”.

رحم الله سلوى واديب حداد، ورزقالله على هيديك الايام الحلوي اللي ما بتنسى وبتضل ذكراها حيّه بالبال…!!