خبز
سليمان بختي
الخبز طيب مع الصحة
هيك قالوا الكبار
عرفوا الاساس
لا ضاعوا ولا ضيّعوا الناس
صحتك هي حصانك
ويا ويل الفارس
اذا حصانو كبى
ما بتعرف لوين بياخدك
***
مش من زمان
وقع الفاس بالراس
وما عدنا نعرف
كيف ضاع الانسان
وكيف فل زعلان
ساعة بدو الحياة
وساعة بدو صورة عنها
وساعة بدو الآخرة
ويقطع الدني واللي فيها
ومرة فاقد الاحساس
ومرة مقاطع الناس
لمين هالدني
لمين هالكاس
يمكن ما في شي
وراء كل هالاشياء اللي شايفينها
يمكن فراشة عم تحلم
او وردة ضيّعت طريقها
يمكن انا وانت كنا شي
كنا صورة كنا فكرة
وجينا بعد سكرة
اهم شي انت ورايح
تاخد معك صورة حلوة
بتذكرك بهالمشوار
كل شي طيب مع الصحة
هيك قالوا الكبار
***
(*)الصورة الرئيسية: صورة الشاعر سليمان بختي مضافة إلى لوحة بريشة الفنان التشكيلي غاندي بودياب